اُدھر ہیں منجمد اب اشک میرے بہہ نہیں سکتے
اِدھر یہ حال ہے دردِ جدائی سہہ نہیں سکتے ۔۔
دھڑکنا دل کا بھی ہے شرطِ لازم زندہ رہنے کو،
فقط ایک سانس لینے کو تو جینا کہہ نہیں سکتے ۔۔
نہیں ہے جستجو تو خواب بھی بکھریں گے یہ طےء ہے
بنائے حوصلوں کے کچے مکاں بھی ڈھہہ نہیں سکتے ۔۔
غلط فہمی ہے سنگِ دل گُماں باقی رہے تیرا ،
مگر کس نے کہا تجھ سے کہ تم بن رہ نہیں سکتے۔۔
از : شبلی فردوسی۔۔۔
وہ ہنسنا کھیلنا، اٹکھیلیاں کرنا روانی سے
تھا بچپن خوب تر تیرا میرے جاناں جوانی سے ۔۔
تمہاری آنکھیں نم ہیں، الجھنیں ہیں، ماجرا کیا ہے
کہ چشمِ نم جدا بچپن ہوا ہے نوجوانی سے ۔۔
کہا تھا ہمسفر ہو تیرے بن نہ رہ سکیں گے ہم ۔۔،
ہوا کیا ، بھر گیا پھر دل محبت کی کہانی سے۔۔؟؟
شِکن واضح ہیں ماتھے پہ تمہارے، اب پریشاں ہو
تم ہی نے مانگا تھا جبکہ یہ لمحہ زندگانی سے ۔۔
جلے گا گھر مِرا تو آنچ تم پہ بھی تو آئیگی ۔۔ ،
نہ ہیں کیونکہ جدا نہ ساتھ، تیری مہربانی سے ۔۔
میری خاطر کرو ایک اور زحمت کو گوارا تم ۔۔ ،
وجہ بتلاؤ ترکِ تعلق کا حق بیانی سے ۔۔
ہمیشہ کہتا ہوں پر سچ ہی جانو جو بھی کہتا ہوں،
نہیں ہوگا بیاں باطل میری صدقِ زبانی سے ۔۔
زہِ قسمت تھے کچھ رہبر جنہوں نے حق بتایا تھا ،
نہیں بچ پایا پھر بھی میں عشقِ ناگہانی سے۔۔
مجھے تم سے نہیں کوئی شکایت خود سے ہے شبلی،
کہ میں ہی ہو گیا بد دل تمہاری ہر نشانی سے
از :- شبلی فردوسی ۔۔۔
زندگی کی حقیقت تو کچھ بھی نہیں پھر بھی سینے سے اس کو لگائے ہوئے ،
ورنہ جی چاہتا ہے اسے چھوڑ دیں کیوں ہیں بارِ گراں یہ اٹھائے ہوئے ۔۔۔
دیکھیئے آسماں اور دیتا ہے کیا اور دینے سے پہلے یہ لیتا ہے کیا ،
میری جھولی میں جو کچھ ہے سب ہے تیرا ہم تو کب سے کھڑے سر جھکائے ہوئے ۔۔
میں فراقِ شبِ غم کا ایک داغ ہوں، جو بہاروں میں اجڑے میں وہ باغ ہوں،
یہ میرا ظرف ہے جی رہا ہوں ابھی آبروےء سِتمگر بچائے ہوئے ۔۔۔
پارسائی کا دعویٰ جنہوں نے کیا اور کہتے تھے جو خود کو اہلِ وفا،
داغ دامن پہ لیکر کھڑے تھے وہی آستینوں میں خنجر چھپائے ہوئے ۔۔۔
میں گنہگار ہوں یا کہ بدکار ہوں، مجھ کو اقرار ہے میں خطاکار ہوں،
اس لئے میں شریفوں کی دنیا سے دور اپنی دنیا الگ ہوں بسائے ہوئے ۔۔۔
کون ایسا نہ تھا جس نے کچھ نہ کہا پر بہ ایں پابندیء رسمِ وفا،
ایک شبلی خاموش تھا بزم میں قفل اپنی زباں پہ لگائے ہوئے ۔۔۔
از:- شبلی فردوسی۔۔
تصوّر کر کے تو دیکھو مجھے تم پاس پاؤگے
جو پیچھے چھوڑ آےُ ہو وہی احساس پاؤگے،
تمہیں تکلیف ہوتی ہے میرے خوابوں کی دستک سے
نگاہِ شوق سے دیکھوگے تو تعبیر پاؤگے۔۔۔۔ ،
تمہاری یاد سے اکثر میں دل کا خون کرتا ہوں
جو تم بھی یاد رکھوگے مجھے تو درد پاؤگے۔۔۔
میں سادہ لوح تھا شاید سمجھ میں آ نہیں پایا
کبھی کوشش ہو فرصت میں یقیناً جان جاؤگے۔۔۔
جلا کر اپنی ہستی کو کبھی پایا تمہیں میں نے
شمع جو تم جلاتے ہو صبح تک بجھ ہی جاؤگے۔۔۔ ،
دلیلیں کھوکھلی خالی، چلو مانا میری ساری ،
مگر تم ہی بتا دو یہ مجھے کیا بھول پاؤگے ۔۔؟؟
تکبّر پاس نہ لانا بلندی ہو بھلے جتنی ،
گھمنڈ ہوگا جہاں تم کو وہیں سے مار کھاؤگے۔۔۔
یہ مقصودِ جہاں شبلی ابھی تم نے نہیں جانا،
تم خود سے روبرو ہوکر حقیقت جان جاؤگے۔۔۔
از: - شبلی فردوسی۔
خوشی ہمدم اگر ہوتی تو پھر رونے کو کیا ہوتا
اسے گر پا لیا ہوتا تو پھر کھونے کو کیا ہوتا ۔۔۔
وہ مجھ سے دور نہ ہوتے، میں ان سے دور نہ ہوتا
یہ انہونی نہیں ہوتی تو پھر ہونے کو کیا ہوتا۔۔۔
میں جب جب تھک کے رکتا ہوں تو کاندھے چیخ اٹھتے ہیں،
یہ جیون بوجھ نہ ہوتا تو پھر ڈھونے کو کیا ہوتا۔۔۔
پڑے رہتے یونہی بنجر تمہارے کھیت صدیوں تک ،
میں مٹی میں نہیں ملتا تو پھر بونے کو کیا ہوتا۔۔۔
